كتير من الناس بيتكلموا عن أهمية إدارة الوقت. لكن أنا دايمًا كنت شايف إن ده غير مُلهم ومستحيل أتبعه. اللي اكتشفته على مدار السنين هو إن إدارة الطاقة بتكون أقوى بكتير. على الأقل، ركز الأول على تحسين طاقتك – كقاعدة أساسية. لو قدرت تتخلص من الحاجات اللي بتستنزف طاقتك وتعزز الحاجات اللي بتمدك بالطاقة، إدارة الوقت بتظبط لوحدها.
على مدار السنين اللى فاتت كنت بتعلم من اشهر الخبراء فى تطوير الأداء، علم النفس الايجابي وعلم الأعصاب، وكان عندى فضول كبير ومازال على اكتشاف وفهم نمط حياة الاشخاص المحترفين فى مجالاتهم واتعلمت بعض العادات اللى بشكل ما لقيتها مشتركة بين كل الاشخاص اللى طاقتهك مرتفعه وبيقدروا ينجزوا ويتعاملوا بكفاءة عالية مع مسؤولياتهم وجدول اعمالهم اللى بيزداد تعقيدا مع الوقت مع كل نجاح بيحققوه.
لما بدأت اطبق العادات اللى بيطبقوها فى حياتهم لاحظت انى طاقتى زادت بشكل كبير والحمد لله وبدل ما كنت بستصعب حاجات كتير لانى كنت مستنذف وكسول اغلب الوقت، اصبحت منتج وبدأت اسعى لأهدافى بقوة واصرار وانا عندى ثقة فى قدرتى على التعامل مع التحديات طالما قادر احافظ واستثمر فى طاقتى بشكل يومى من خلال العادات اللى بقدمهالك عشان انت كمان تقوى على تحدياتك الشخصية فى كل يوم بتعيشه.
٥ عادات لرفع مستوي طاقتك زى المحترفين
1. اقضي وقت فى الحركة البدنية
إحساسنا بالطاقة مربوط تمامًا بتوافقنا مع السلوكيات الطبيعية بتاعتنا. الإنسان مش مخلوق علشان يعيش حياة فيها ركود وكسل ويبقى بيعمل كل حاجه وهو قاعد فى مكتبه او على كنبة. ده السبب الرئيسي ليه الناس مكتئبة الأيام دي. الناس اللي عندها طاقة عالية بتتحرك باستمرار زي أجدادنا. بصراحة، أنا مؤمن إننا كلنا رحالة. الحركة المستمرة والتمرين بيشغلوا الدم وبيخلوا الإندورفين (المواد الكيميائية السعيدة) مرتفعة. ماينفعش تعتمد على التفكير الإيجابي عشان تكون في مزاج كويس. لازم تخصص جزء كبير من يومك للحركة، حتى لو كان مجرد مشي.
مؤخرا بدل ما كنت بتمرن مرتين او ثلاثة مرات فى الاسبوع كل مره لمدة ٩٠ دقيقة اتحديت نفسي اتمرن كل يوم لمدة ٢٠ دقيقة عشان استفيد اكتر وبشكل يومى من دور الحركة البدنية فى تعزيز نشاطى وصحتى النفسيه والعقلية.
فى الاوقات اللى بشتغل فيها بدأت اتحدى نفسي اقوم اتمشى كل ساعة او اكتر لمدة ٥ دقايق افرد فيهم ظهرى واعمل شوية استرتشات لجسمى وبالاخص رقبتى مع التنفس بعمق. ممارسة بسيطة وسريعة زى دى كان ليها تأثير كبير جدا على مستوى طاقتى وتركيزى خلال اليوم.
اتحدى نفسك تحرك جسمك كل يوم وهتشوف النتيجة فى نفس اليوم.
2. اعمل لنفسك روتين بسيط
العالم ممكن يكون بيئة معقدة، والتعقيد بيحتاج لمعالجة دماغية أكبر. ده بيستهلك طاقة كبيرة لان المخ ورغم انه بيشكل حوالى ٢٪ بس من وزن الجسم الا انه بيستهلك ٢٥٪ من طاقة الجسم لانه اعقد جزء فى تكوينا وشغال على مدار اليوم وفى كل لحظة عشان كده، لما نبسط حياتنا ونقلل الخيارات ونحافظ على روتينات بسيطة، بنوفر طاقة أكتر ونقدر نركز في حاجات أقل. ده بيحسن الأداء في كل المجالات، وبنبقى أفضل في الحياة عمومًا.
حضر الملابس بتاعتك للاسبوع كله فى يوم واحد.
ثبت شكل روتينك الصباحى بحيث لما تصحى متفكرش تاخد دوش ولا لا، تفطر ايه وامتى، تفتح تليفونك ولا لا. قرر كل ده مسبقا بحيث لما تصحى يكون تركيزك على الحاجت المهمة اللى عايز تعملها فى يومك، بلاش تضيع طاقتك فى اول ساعة فى اليوم بالتفكير فى لون الشراب اللى هتلبسه وانت رايح الشغل! واتعامل بحذر شديد مع استخدام السوشيال ميديا واستهلاك المحتوى المتنوع والعشوائي لان مخك بيدفع ضريبة على كل دقيقة بتقضيها على السوشيال ميديا واللى بتكون فى شكل طاقة المخك اللى بتستنذف فى التفاعل المستمر مع المحتوي.
3. قلل الأطعمة المصنعه
الأكل المصنع وحش ومضر لابعد الحدود لانه بيخلينا نمرض ببطء. مفيش بديل مصنع يكون أحسن من الطبيعى. المصنع مليان مواد كيميائية بتأثر على جسمنا ومش بنشوف نتائجها غير على المدى البعيد، لكن لو ركزت فى مستوى طاقتك بعد الاكل المصنع هتشعر بتأثيرة السلبي فورا. الجسم بيكره الحاجات المصنعة زي الخبز، المعلبات، الهوت دوج، والكعك والسكر الابيض فى العموم. ده زي ما تصب مربة فراولة في محرك العربية. ممكن تحس براحة لما تأكل بسكوت بالشوكلاتة او تشيزكيك لما تكون مضايق. بس ده عشان الحاجات دى مليانه مواد كيميائية بتخدع دماغنا وتحسسنا إننا بناكل الصح لحد ما نلاقي نفسنا تاني يوم بنطلع زفت من جسمنا ونشكر ربنا على حركة الأمعاء اللى رحمتنا من اللخبطة اللى دخلناها جسمنا.
مبدأيا الغى السكر الابيض تماما من نظامك الغذائى اليومى ولو بتحب حلويات معينه خليها مره واحدة فى الاسبوع. تعرف ان الخلايا الوحيدة اللى بتستفيد من السكر المصنع هى الخلايه السرطانية فقط؟ ايوه السكر الابيض المصنع مضر بس وملهوش اى اثر ايجابى او مفيد بأى شكل لجسمك.
4. اشتغل لهدف أكبر منك
لما تكون فى بداية حياتك العملية، بتجرب حاجات كتير وبكون اهم اولوياتك إنك تجيب دخل أساسي. في السياق ده، بتكون أناني في اختياراتك المهنية وده كويس. لكن مع الوقت، بتحاول تعمل كل حاجة لنفسك بس وانت بتسعى للوصول لمستوى يخليك مقبول اجتماعيا بس اثناء الرحلة دى بتشوف روحك بتختفي شوية بشوية. الحياة بتكون مليانة لما يكون ليك هدف أكبر منك، حتى لو كان لعيلتك المستقبلية (اللي لسه مش موجودة). مش لازم تعمل شغل هادف عشان الفلوس. ممكن يكون حاجة بتحبها وشغوف بيها بتعملها جنب شغلك وتدريجيًا تخليها الحاجة الأساسية لما تكون مستعد للخطوة دى. بس خد خطوات في الاتجاه اللى بيبسطك، استكشف اكتر واعمل الحاجات اللى بتظهر من خلالها ابداعك وتميزك، الحاجه اللى بتعرف منها ان الحياة اكبر واوسع من تعظيم الأنا بتحقيق توقعات الآخرين منك. لو بتعمل حاجه بتحبها فى يومك حتى لو لمدة ساعة واحد الحاجه دى هتمنحك طاقة نفسيه كبيرة على عكس الحاجات اللى مضطر تعملها عشان تحافظ على دخلك وتدفع بيها الفواتير الشهرية.
٥. رتب أولوياتك يوميًا
الناس اللي بتحافظ على طاقتها اتعودوا يرتبوا الحاجات الأهم بالنسبة لهم يوميًا كعادة. لو ماعملناش كده، بننتهي بأننا بنبقى بنوافق وبنقول “حاضر ونعم” للمتطلبات العشوائية خلال اليوم اللى بتيجى من الشخص، علاقتنا الشخصية او حتى الناس اللى بنقابلهم فى الشارع وبنلاقى نفسنا فجأه بنجري في عشر اتجاهات مختلفة مرة واحدة ونقول هو ليه إحنا مشغولين طول اليوم.
لو معندكش اولويات واضحة لحياتك بصفة عامه ويومك بصفة خاصة، يومك هيسيطر عليك مش انت اللى هتسيطر عليه، الحياة هتحرك فى اتجاهات عشوائية بدل ما انت اللى تتحرك فى اتجاه من اختيارك، والنتيجية ان طاقتك هتستنذف، بجد لو بتعمل كده هتزعل، ده لو مكنتش زعلان بالفعل. اعرف إنت عايز إيه وأكد على الأهم في كل خطوة بتاخدها. قول نعم وحاضر للحاجات المهمة والضرورية لهدفك وغايتك من الحياة، وقول” لا، شكرا، مش مهتم” لكل حاجة تانية. ده شغل مستمر على عقليتك، بس هيحافظ على طاقتك في أفضل حالة.
الخلاصة
عشان تستمتع بمستويات طاقة عالية، لازم تكون عندك النية في تنفيذ بالمطلوب عشان النتيجة تتحقق. إدارة الطاقة مش اختيار – ده أسلوب حياة.
انصحك دلوقتى تمسك ورقة وقلم وتعمل عمودين اكتب فى العمود الاول الحاجات اللي بتستنزف طاقتك، وفى العمود التانى اكتب الحاجات اللي بتزيدها. لازم نكون حكيمين ونعمل التمرين ده بشكل فردى لأن فيه حاجات كتير بتنطبق على تحسين طاقتنا مش بالضرورة تنطبق على غيرنا. بالوعي ده، هتعرف إيه العادات اللي محتاجة تتخلص منها وإيه اللي تعمله أكتر لتعزيز طاقتك. كمان اسأل نفسك: “إيه الأنشطة اللي بتخلى طاقتى ايجابية او بتشعرنى بالسلام الداخلى والصفاء الذهنى؟” وبعدين، املأ حياتك بالمزيد من الأنشطة اللى ذكرتها.
إدارة الطاقة مش لازم تكون معقدة، لكن حتى لو كانت معقدة احنا فعليا مافيش عندنا اختيار غير انها تكون اولوية قصوى فى حياتنا، لان الحياة هيبقى شكلها وحش اوى لو معملناش كده.
لو محتاج تتعلم المبادئ العملية لعلم النفس الإيجابي، احضر الفيديو ده على يوتيوب ( من الكسل والإرهاق للطاقة والحماس ) بس خلى معاك ورقة وقلم عشان الفيديو فيه تفاصيل كتير.
