إيه المشترك بين دكتور مجدي يعقوب، ستيف جوبز، و نيلسون مانديلا؟
مبدئيًا أنا تعمدت أختار 3 أشخاص مختلفين من حيث الإنجازات اللي حققوها:
- دكتور مجدي يعقوب قدم ابتكارات كبيرة وعمل ثورة في طرق علاج أمراض القلب واسس مستشفيات لعلاج امراض القلب بالمجان.
- ستيف جوبز أسس شركة “Apple” وعمل ثورة تكنولوجية في الهواتف الذكية والكمبيوتر المحمول العالم هيفضل عايش في اثرها لسنين طويله.
- نيلسون مانديلا قاد جنوب أفريقيا لإنهاء نظام الفصل العنصري وأصبح أول رئيس أسود وحصل على جائزة نوبل للسلام
كلهم من مجالات مختلفة، وكل واحد فيهم متخصص في مجاله لأبعد الحدود. كلهم بيشتركوا في العبقرية والتميز في مجالاتهم، لكن كمان بيشتركوا في شئ مهم وحاسم وهو قدرتهم علي التواصل الفعال مع الآخرين.
مافيش حد فيهم حقق انجاز ضخم بمجهوده الفردي الخالص.
كل واحد فيهم استعان بفريق عمل يساعده، كل واحد قدر يشرح رؤيته بوضوح ويخلي اللي حواليه يصدقوه ويحطوا ايديهم في ايديه. كل واحد فيهم قدر يسوق ابتكاراته افكاره ويبرز مزاياها للعالم. كل واحد فيهم قدر يحصل على دعم رواد أعمال، ومستثمرين، او متبرعين. كل ده كان صعب يحصل بدون قدرتهم علي التواصل الفعال مع الآخرين.
في أحدث اللقاءات المُسجَّلة لدكتور مجدي يعقوب وهو بيعلن بنفسه عن أحدث ابتكاراته الطبية لسنة 2025، وهي صمامات قلب طبيعية بتعيش مع الإنسان طول حياته، شوف إزاي اتكلم وقدم الابتكار بلغة بسيطة تخاطب الإنسان العادي وتزرع الأمل في قلوب الناس، خصوصًا اللي بيعانوا من مشاكل في صمامات القلب سواء كانوا بالغين أو أطفال.
هو ده بالظبط اللي قاله د. مجدي في مداخلة هاتفية على قناة MBC مصر:
“دراسات ضخمة أثبتت أن الصمام الحي بيعيش مدة طويلة. مش بس كده، بيطول الحياة وبيزيد السعادة والنشاط والطاقة. الحاجة التالتة المهمة جدًا: لما بنحطه في الأطفال، بيكبر مع الطفل، والطفل ما يلزموش أكتر من عملية واحدة، وممكن الصمام يتحط من غير عملية من خلال القسطرة. كل دي حاجات هدية ضخمة للإنسانية في جميع أنحاء العالم.”
د. مجدي عمل مداخلات هاتفية ومقابلات مسجله مع أشهر المحطات التلفزيونية المحلية والعالمية، وشرح المنافع اللي هتعود على الإنسانية كلها من الابتكار ده وازاي هيأثر على رفع جودة حياة الناس ويخليهم أكثر سعادة وحيوية.
لو مش بتسمي ده مهارات تواصل، أنا مش عارف ممكن نسميه إيه!
بحسب دراسة مشهورة، 85% من نجاحك المهني بيتوقف على مهارات التواصل. مهارات التواصل مش حكر على مهن معينة. مهارات التواصل ضرورة لكل انسان حتي اللي بيشتغل على مكتب او في مُختبر. المهندس والطبيب والمبرمج والكاتب والمحلل، وغيرهم، بدون مهارات تواصل قوية فرص نجاحهم وتميزهم بتكون محدودة جداً.
الخبرة وحدها لا تكفي
بنسمع عن المهارات الناعمة لكن مش بنسمع عن المهارات الصلبة والفرق بينهم. المهارات الصلبة هي ببساطه مجال تخصصك وسنوات الخبرة، علي سبيل المثال الهندسه، الطب، الاقتصاد، الفيزياء، البرمجه وغيرها كلها تعتبر مهارات صلبة. انما المهارات الناعمة بتعني مهارات التواصل والعمل مع الاخريين.
- المهارات الصلبة تعتبر الادوات اللى بتعمل بيها شغلك.
- المهارات الناعمه تعتبر طريقة استخدامك للأدوات.
خلال ١٢ سنة من العمل في عدد من الشركات شوفت نموذج بيتكرر قدامي في كل مكان اشتغلت فيه. شوفت الشخص اللي عنده خبرة محدودة من الناحية التقنية (ادوات محدودة) لكن مع ذلك قدر ينجح ويوصل لمنصب عالي بسبب مهارات التواصل (طريقة استخدام الادوات). وشوفت كمان الشخص اللي عنده خبرة اكبر لكنه ثابت في مكانه بقاله سنين مش بيتحرك بسبب ضعف قدرته علي التواصل. في كل مره كنت بلاحظ واحلل الاسباب كنت دايما بلاقي العنصر الفارق هو مهارات التواصل.
خبرة قليله ومهارات تواصل قوية، افضل من خبرة كبيرة ومهارات تواصل ضعيفه.
لو ما عرفتش تكسب الناس، هتخسر.
المهارات الناعمة، زي التواصل الفعال والعمل الجماعي، بقت حاسمة للنجاح المهني في عالمنا دلوقتي اكتر من اي وقت فات. ممكن تكون إنسان ذكي جدًا في الحاجة اللي بتعملها، لكن لو مش بتقدر تفهم الناس وتتواصل معاهم بفعالية، هتلاقي نفسك واقف قصاد حيطة سد. مشاكل مع الاهل، سوء تفاهم مع زمايلك في العمل، صراعات شخصيه في بيتك وشغلك، مافيش حد مصدق في حلمك، ولا حد بيساعدك توصل لهدفك.
نجاح علاقاتك بالناس دليل علي نجاح الطريقة اللي هتوصلك لأهدافك وفشل علاقاتك بالناس دليل علي فشل الطريقه اللي بتحاول تنجح بيها وتوصل لأهدافك. اتعلم تكسب الناس في صفك والا هيكونوا عقبه في طريقك.
الناس موجودين في كل يوم بتعيشه. أهلك، أصحابك، زمايلك في العمل، مديرك، العملاء اللي بتخدمهم، فريق العمل في مشروعك. كل حاجة بتعملها فيها ناس، فضروري تتعلم المهارات اللي تساعدك تعرف تتعامل معاهم.
“التواصل هو المهارة الأهم في الحياة. كلما سعيت لفهم الآخرين بصدق، زادت قدرتك على التأثير فيهم.” – ستيفن كوفي
كل صعوبه او معاناه عشتها في حياتك كان فيها شخص ما تسبب في جزء كبير منها، وكل لحظة سعيده في حياتك كمان كان فيها شخص او اشخاص تسببوا في جزء كبير منها. الحياة وكأنها بتقولك “ضروري تتعلم ازاي تتعامل مع الناس، عشان تلقى خيرهم وتحمي نفسك من شرهم.”
مش كل الناس يهموك. ركز علي اللي بينك وبينه مستقبل مشترك. ركز علي تحسين قدرتك علي التواصل مع الاشخاص اللي بتجمعك بيهم مصالح مشتركة. المصلحة تعني هدف او منافع مشتركه ومش دايما بتكون منافع ماديه. المصلحة عنصر اساسي في كل العلاقات الناجحة. المصلحه هي انك تساعد الناس زي ما بيساعدوك، او عشان يساعدوك. المصلحه انك تحاول تفهم الناس عشان لما تتكلم يحاولوا يفهموك. المصلحه انك ماتخلقش لنفسك عداوه في مكان شغلك عشان تشتغل وانت بالك مستريح. المصلحة انك تجيب لزوجتك هديه وتعملها مفاجآه عشان تحبك اكتر وحياتكم تبقي سعيدة. المصلحه انك تتكلم عن شغلك وتظهر انجازاتك لصناع القرار عشان يعرفوا القيمه اللي بتقدمها وتلاقي فرص اكتر. كل ده محتاج مهارات تواصل قوية.
الانطوائية ضد مصلحتك. مش طبيعي تبقي عايش وبتشتغل مع الناس لكن في الوقت ذاته انطوائي، منعزل عنهم فكريا وشعوريا، بتحكم عليهم، بتبني حواجز نفسيه بينك وبينهم، خايف تقرب، خايف تتكلم، خايف تتواصل، وخايف من الرفض. مش من مصلحتك تركز بس علي مصلحتك وتتجاهل مصالح الأخرين.
مهارات التواصل بتساعدنا ننجح مع الناس ونتميز بدعمهم ومساعدتهم. مافيش حد ممكن يفكر يدعمك او يستمر في دعمك بدون ما يحصل علي مقابل. العلاقات مصالح مشتركة كل طرف مسؤول عن تقديم النفع للطرف الاخر. هو ده جوهر التواصل الناجح الفعال مع الآخرين.
مهارات التواصل طريق رايح جاي ماتستناش الناس تقدرك وتحترمك وتحاول تساعدك وانت قافل علي نفسك وماشي جنب الحيط محدش يعرف عنك حاجه ولا عن القيمه اللي ممكن تقدمها لغيرك.
مش كفايه تكون عارف قيمتك، مهم كمان تظهر قيمتك والناس تشوفها، مهم تعبر عن اخلاقك وقيمك، تتكلم عن شغلك، مهم تشارك افكارك وتحكي قصتك. مش كفايه تكون بتصلي وبتصوم مهم كمان دينك يظهر في حسن تعاملك مع الناس واولهم اهل بيتك.
٣ خطوات لتطوير مهارات التواصل
المهارات الناعمه بتشمل مجموعه من المهارات المختلفه زي مهارات التواصل، الذكاء العاطفي٫ التفكير النقدي٫ ادارة الوقت، وحل المشكلات، والمرونه. مهارات التواصل هي الاساس المشترك بين جميع المهارات الناعمة، وبالتالي نعتبرها الاولويه.
- اتعلم اكتر عن مهارات التواصل، برشحلك كتاب “كيف تكسب الاصدقاء وتؤثر في الناس” لـ ديل كارنيجي. وكتاب “قوانين الطبيعة البشرية” لـ روبرت جرين. احضر فيديوهات TED حول موضوع مهارات التواصل.
- قوم بدور المحلل السلوكي للاشخاص اللي حواليك وممكن يكون ليهم تأثير ما علي حياتك، حاول تفهم اهتماماتهم، مخاوفهم، ومزاياهم. لاحظ سلوكياتهم مع الغير وحاول تحدد شكل مساحة التعامل بينك وبينهم ممكن تكون عامله ازاي وايه حدود العلاقة اللي ممكن تكون بينك وبينهم، افهم انت ممكن تقدم لهم ايه ومتوقع منهم يقدموا لك ايه. كل ده هيساعدك تتواصل مع الأخرين بفاعليه اكتر وتأثر فيهم لأنك اهتميت تفهم طبيعتهم من الاول.
- طبق اللي بتتعلمه من القراءة والملاحظة في محادثاتك اليومية مع الاشخاص اللي في حياتك ولاحظ الفرق. افضل طريقة بالنسبالي هي اني اعمل فرضيه عن شخص معين زى مدير جديد بشتغل معاه لاول مره، مثلا في البدايه هركز اني الاحظ سلوكة وطريقة تواصله مع الغير ومختلف ردود افعاله. واستنتج انه بيكره مثلا الكلام عن المشاكل والصعوبات في الشغل، او تاجيل العمل. وهنا انا ببدأ اركز اعمل العكس، اتكلم عن الفرص والحلول اكتر واسلم الشغل قبل ميعاده. بكده اكون كسبت مديري لانى بحقق له مصلحه وبساعده ينجح كا مدير وفى المقابل هو كما هيقدر شغلي وهيسمع لاقتراحاتي ويساعدني انجح.
الخلاصة، تطوير مهارات التواصل رحلة تتطلب قراءة وتفكر وملاحظة لسلوكيات الاشخاص اللي في حياتك، كل ده بيعزز من قدرتك علي فهم الاشخاص واختيار الاسلوب والوسيله المناسبة للتواصل مع كل شخص او مجموعة من الاشخاص بشكل فعال. طبيعي يكون فيه اخطاء اثناء تعلم او تطوير اي مهاراة ولكن اكبر خطأ هو انك تتعامل مع مهارات التواصل علي انها اختيار وهي في الاصل ضرورة.
