الناس فاكرة إن اللي عنده أهداف واضحة أكيد هيشتغل عليها على طول، بس الحقيقة إن ده مش دايمًا صح.
التسويف يعني إنك تأجل شغلك على حاجة معينة بشكل متكرر، وده ما بيظهرش إلا لما يكون عندك هدف فعلًا. بمعنى:
- التسويف مربوط بوجود هدف.
- مفيش تسويف من غير هدف.
ليه أصحاب الأهداف الكبيرة هما أكتر ناس بتسوف؟
على عكس اللي الناس متوقعاه، اللي عنده أهداف طموحة وكبيرة بيكون أكتر واحد بيقع في فخ التسويف. ليه؟
لأن كل ما الهدف كان كبير، كل ما المسؤولية النفسية بتكون أكبر، وكل ما الضغط النفسي بيزيد. ساعتها، عقلك وجسمك بيلجأوا للتسويف كطريقة للهروب من الضغط ده.
لكن السبب الحقيقي؟
إنك محمل نفسك فوق طاقتها.
الحل؟
انك تحول هدفك الكبير لخطوات اصغر واسهل عشان تهون على نفسك عبئ التنفيذ.
تجربتي مع التسويف
انا بواجه التسويف كتير فى حياتى ومن ضمن الحاجات اللى كنت بسوفها هو كتابة المقالات.
كنت بفكر أكتب مقالات بشكل منتظم، بس فضلت أأجل فى التنفيذ تقريبا لمدة سنة. ليه؟
لأنى كنت شايف الموضوع مسؤولية كبيرة جدًا، وكنت خايف ما أقدرش ألتزم.
كل شوية أسأل نفسي:
- هكتب عن إيه؟
- ازاى هحضر للموضوع اللى هكتب عنه؟
- إيه الأسلوب اللي هيبقى مناسب؟
الأسئلة دي كانت بتضغط عليّ جدًا،لانى كنت معتقد انى لازم اختار الموضوع واحضرله واكتبة فى يوم واحد. فكنت باهرب وأشغل نفسي بحاجات أسهل.
الحل اللى ساعدني؟
إن هدفي الكبير يتحول لخطوات صغيرة بالشكل ده:
1. أختار موضوع المقال في يوم.
2. أكتب الأفكار المهمة على مدار الأسبوع.
3. أجهز النقاط الأساسية في يوم لوحده.
4. أكتب المقال في يوم تاني.
5. أراجع المقال وأنشره في يوم منفصل.
النتيجة؟
- بقيت أكتب مقال كل أسبوع بدون ما اشعر انه عبئ كبير.
- بشعر بالإنجاز كل مره بنشر فيها مقال جديد لانى حققت هدفى الاسبوعى.
- كتبت ١٩ مقال فى اقل من ٤ شهور ودى حاجة بتحفزنى استمر.
- وهدفي دلوقتي هو انى أكتب 100 مقال قبل نهاية 2025.
اي هدف نفسك تحققه هيكون صعب بالأخص لو كان جديد عليك وطبيعى انك تأجل وتسوف العمل عليه.
لو عايز تتغلب على المشكلة دى قلل مستوى الصعوبة والتحدى لمستوى مناسب لإمكانياتك الحالية ومافيش طريقه اسرع من انك تقسم هدفك الكبير لأهداف صغيرة.
أهمية الأهداف الصغيرة
الأهداف الصغيرة بتدي إحساس بالإنجاز وتخليك متحفز تكمل.
الدراسات المرتبطة بنظرية تحديد الأهداف (Goal Setting Theory) بتدعم فكرة إن الأهداف التدريجية أو القابلة للتحقيق بتوفر تحفيز أعلى لأنها بتوفر إحساس بالإنجاز المستمر وبتعزز الالتزام.
مثلاً:
- لو هدفك تخس 20 كيلو، ممكن تحبط جدًا لو بعد أسبوع تمرين شاق خسيت نص كيلو بس.
- لكن لو هدفك تتمرن 3 أيام في الأسبوع، هتحس بإنجاز كل أسبوع، وهتبقى متشجع تكمل.لما تركز على الأهداف الصغيرة، هتتحول لعادات، والعادات هي اللي هتوصلك للهدف الكبير.
إزاي تتعامل مع التسويف؟
بدل ما تلوم نفسك وتكتئب بسبب التسويف، اعتبره رسالة من عقلك وجسمك بتقولك:
“هدفك كبير أوي، قسمه لأهداف أصغر.”
خطوات بسيطة تساعدك:
1. حدد الهدف الكبير اللي عايز توصله.
2. قسمه لأهداف صغيرة مثلا هدف كل اسبوع.
3. اعمل خطة أسبوعية عشان تحقق الأهداف الصغيرة.
4. حول الخطة لعادات بسيطة.
5. التزم بالعادات وهتلاقي نفسك بتنجز.
الخلاصة
- التسويف بيحصل لما الأهداف تكون كبيرة وبعيدة المدى.
- الإنجاز بيحصل لما الأهداف تكون صغيرة وسهلة التنفيذ.
- الهدف الكبير مهم عشان يحدد اتجاه السعي.
- الهدف الصغير هو اللي هيخليك تتحرك وتنجز.
