سؤال قديم اوى السؤال بتاع ازاى احدد هدفى او غايتى من الحياة، بس النصايح كترت واحنا احتارنا وبقينا مش عارفين نعمل ايه ولا ايه. فى الحقيقة اجابة السؤال ده فى نقطتين، سميهم قواعد، او شروط او قوانين بس هما بجد جملتين من 18 كلمة بس:
- استكشف وجرب لحد ما تلاقى الحاجه اللى بتحبها.
- صمم حياتك بالشكل اللى يخليك تعمل الحاجه اللى بتحبها اكتر.
١. استكشف وجرب لحد ما تلاقى الحاجه اللى بتحبها.
مسؤوليتك الاولى تجاه نفسك انك تستكشف وتجرب حتى لو قعدت سنين بتعمل ده بتشتغل عشان توفر دخل يكفى احتياجاتك وبتنتقل من وظيفه لوظيفه ومن بلد لبد وانت فى رحلة من البحث عن شغفك او الحاجه اللى بتحبها لما تلاقيها هتعرف انها الحاجه اللى بتشبع روحك وبتملى قلبك بالامل واليقين وبتكون سهله عليك كأن ربنا خلقك عشان تعملها وتبقى مميز فيها.
“الرحلة إلى النجاح تبدأ بخطوة واحدة: اكتشاف شغفك.” – ستيف جوبز
٢. صمم حياتك بالشكل اللى يخليك تعمل الحاجه اللى بتحبها اكتر.
مهمتك الوحيده بمجرد ما تكتشف الحاجه اللى بتبحبها هى انك تبدأ تصمم حياتك بالشكل اللى يخليك تعملها اكتر. اختياراتك المهنية، علاقاتك، نمط حياتك، دراستك، مشاريعك الخاصة، اهدافك وخطتك المستقبلية لازم يكونوا بيقربوك من الحاجه اللى بتحبها مش يبعدوك عنها وبيقطعوا علاقتك بيها.
عملك هو الوسيلة والغاية
صورة النجاح والسعاده بالنسبالى هو انك تسعي وتجتهد لحد ما تقدر تعمل من شغفك دخل كافى يخليك تتفرغ له ويبقى هو شغلك الشاغل عشان تكبره وتبدع فيه، وساعتها شغلك ممكن يتحول من وسيلة لغايه، يعنى بدل ما كنت بتشتغل عشان تحقق هدف معين، شغلك يبقى هو الهدف لانك بتعمل بتستمتع به، وبتطور معاه شخصيا وبتقدم من خلاله قيمة للعالم وبيجيلك منه دخل يخليك تعمله اكتر وافضل.
“إذا كنت تفعل ما تحب، فلن تحتاج إلى العمل يوماً واحداً في حياتك.” – ماركوس أوريليوس
دى الطريقة والنتيجة بس بينهم رحلة على الاغلب طويلة فيها محاولات، خبرة، فشل، علم، مهارات، وعي، شك، ضعف، ايمان، قوة، الم، اصرار، احباط، انتصار .. الخ
كل ده بيهون عليك وبتقدر عليه طالما بتسعى فى حاجه انت بتحبها ومهوس بيها لان لحظة الوصول تستحق كل جهدك وسعيك لانها نفسها الحظة اللى بتاخد فيها اول خطوة جوه حلمك وانت واقف على رجليك ومفتح عينيك.
