الشخص المشغول بيعمل حاجات كتير غير مهمه، انما الشخص المنتج بيعمل حاجات قليله ضرورية.
لو مش لاقى وقت كفايه تشتغل على احلامك او اهدافك، ممكن تقدر توفر ٢٠ ساعة واكتر بكل سهوله.
في تقنيات بسيطة جداً تقدر تخليك أكثر فعالية من 95% من الناس في مجتمعنا المليان بالتشتت واهدار الوقت.
ابسط التقنيات دى واسهلها بالنسبالى هو انك تبدأ بتحليل عدد ساعات الأسبوع:
كل واحد فينا عنده نفس الـ 168ساعة في الأسبوع، مافيش حده عنده اكتر او اقل، هما 168 ومع ذلك، الناس عادة بيقولوا “مافيش وقت كفايه” وده عذر ممكن يمنعهم من العمل على أهدافهم أو أحلامهم. لكن تفتكر العذر ده منطقى؟ تعالى نشوف.
لو بصينا على تقسيمة الاسبوع فى حياة أى واحد فينا وحللنا عدد ساعاته ممكن تطلع بالشكل ده:
العمل: 40 ساعة (بواقع 8 ساعات لمدة 5 ايام)
النوم: 56 ساعة (افتراضًا 8 ساعات في الليلة)
الطبخ والاكل: 14 ساعة (افتراضًا ساعتين يوميًا)
التنقل والمواصلات: 10 ساعات (بتختلف من شخص للتانى بس نقول المتوسط ساعتين)
العادات والأعمال المنزلية: 14 ساعة (ساعتين يوميا للعبادات، الاستحمام، التنظيف، الخ)
الترفيه والاجتماعيات: 14 ساعة (حوالي ساعتين كل يوم )
كل ده مجموعه 148 ساعة، كده لسه باقي 20 ساعة محتاجين نوظفهم!
طبعا كل ده نسبى وبيختلف من شخص لشخص ومن وقت لوقت، بس اللى عايز اقولة هو انك لما تحلل عدد ساعات الاسبوع دايما هتكتشف انه فيه وفره من الوقت الاضافى اللى تقدر تستغله فى العمل على اهدافك وطموحاتك الشخصية.
لو حللت عدد ساعات الاسبوع ومقدرتش تلاقى وقت اضافي، يبقي اكيد انت بتعمل حاجات غير مُهمه او حاجات ينفع غيرك يعملها عنك او في اسوء الحالات تقدر تعملها اسرع. فحاول تجاوب على الاسئلة دى:
- ايه المهام اليومية اللى ممكن تنجزها بكفاءة افضل ووقت اقل؟
- ايه هى المهام الغير اساسية اللى ينفع تلغيها، او تفوضها لحد، او تستبدلها بأشياء أهم؟
- ايه الملهيات (زى السوشيال ميديا، الالعاب، المسلسلات) اللى ممكن تقضي عليها وقت اقل او حتي تلغيها تماما؟
خليك فاكر انك حتى لو معندكش وقت كفايه، انت لسه عندك طرق توفر بيها وقت.
اتحدي نفسك فى تقليل المهام بالتركيز علي الضروريات وفكر دايما ازاي ممكن ترفع الكفاءة التنفيذية عن طريق التعلم وتطوير مهاراتك.
لو قدرت توفر ساعة واحدة في اليوم فده مكسب كبير ليك ولهدفك.
