لو حاولت تتعلم اكتر من حاجة فى نفس الوقت مش هتتعلم اى حاجة
مراحل التعلم الخمسه هم كالتالي: ١. تحديد الهدف من التعلم ٢. استهلاك المحتوي ٣.التطبيق العملي ٤. تقيم النتيجة ٥.التحسين. الشخص المتوسط اللى بيمثل فئة كبيرة من الناس هتلاقية بيتجاهل الهدف وبيدخل بشكل مباشر فى استهلاك المحتوى وبيقضي فيه ٨٠٪ من عملية التعلم اللى بتكون عشوائية فى مواضيعها لعدم وجود هدف من البداية، فـ بيقدر يحصل على الجانب النظري فى اكتر من موضوع فى نفس الوقت، وبعد فتره تلاقيه بيلوم العالم والظروف اللى مش بيقدموا فرص عادله للاشخاص المتعلمين اللى زيه وهو بيعني الكورسات اللى حضرها، والشهادات اللى اخدها باعتبارها القيمة الحقيقية.
اسوء صور التعلم فى اعتقادى هو التعلم اللى بينتهى بحصولك على معلومة وشهادة.
التعلم الحقيقى بيبدأ مع تطبيق المعرفة على اكتساب مهارة، تحقيق هدف او حل مشكلة محددة.
الجزء العملى بيشكل ٧٠٪ من عملية التعلم ولان الجانب ده بيحتاج تركيز، وجهد ووقت بيكون صعب جدا انك تحاول تتعلم اكتر من حاجه فى نفس الوقت. سهل تعرف معلومات وتحضر كورسات فى اكتر من حاجه فى نفس الوقت، لكن…
لو عايز تتعلم بجد وتستفيد فعليا بقيمة اللى اتعلمته فى نفسك وحياتك لسنين جايه، يبقى ركز على تعلم موضوع واحد ضرورى لحل مشكل جوهرية بتواجهك، او مهارة محتاج تكتسبها، او هدف غالي عليك بتسعي لتحقيقة خلال فترة محددة.
تركيزك على موضوع واحد هنا ضرورى لزيادة فاعلية التعلم وسرعة تحقيق نتيجة، لان تعدد الاهداف بيحطك تحت ضغط وبيخليك اكثر عرضة للتشتت وبيقلل من احتمالية استمرارك لحين تحقيق النتائج المرغوبة. فى مثل روسي بيقول فى ما معناه لو حاولت تجري ورا ارنبين وتمسكهم فى نفس الوقت، يبقى مش هتمسك ولا واحد فيهم
ركز على الموضوع اللى بتتعلمه وارفض كل ما دونه. الرفض لا يعنى بالضرورة عدم الاهتمام باستكشاف او تعلم مواضيع أخرى لكنه ممكن يعني تأجيل كل شئ اخر لحين تعلم الموضوع محط الاهتمام فى المرحلة الحالية وعدم الانتقال لموضوع اخر منعاً للتشتت واهدار الطاقة قبل الانتهاء او على الاقل تحقيق نتيجة عملية مرضية.
اعتبر نفسك داخل كامب لمدة ٣٠ يوم تتعلم فيه الموضوع المستهدف وكأنه غير مسموح لك انك تطلع من الكامب ده الا وانت محقق نتيجة عملية تثبت بيها لنفسك ولأي حد انك فعلا اتعلمت الحاجه اللى غيرك اكتفى بحصوله على مجرد شهادة تثبت حضورة، شهادة لو سألتة فى محتواها هتلاقيه اصلا ناسى، لانه فعلياً لم يتعلم، هو فقط تلقى معلومات.
دلوقتى بقى اسمحلى اسألك كام سؤال يساعدوك تحدد هدفك، تفتكر لو امامك اختيار لتعلم شئ واحد فقط خلال الشهر اللى جاي، هيكون ايه اختيارك؟ وايه بالظبط اللى هيتحسن فى حياتك لو اتعلمت الشئ ده؟ وايه النتيجة اللى لما تحققها هتتأكد انك اتعلمت؟
